ما هي سابرة

ما انا ما عاد لقيت الا هذا التفسير، ان الامارات تخترق سيطرة السعودية التاريخية على اليمن منطقتهم المغلقة، سع عفاش لاما اخترق سيطرة الاصلاح وبيت الاحمر التاريخية على حاشد منطقتهم المغلقة وصنع له مشائخ فيها وفاز بنصف مقاعد المجالس المحلية. ما انا ما عاد لقيت الا هذا التفسير، ان الامارات تخترق سيطرة السعودية التاريخية على اليمن منطقتهم المغلقة، سع عفاش لاما اخترق سيطرة الاصلاح وبيت الاحمر التاريخية على حاشد منطقتهم المغلقة وصنع له مشائخ فيها وفاز بنصف مقاعد المجالس المحلية.. الخ
– انّا معقول السعودية والإمارات مختلفين في اليمن؟
قد انا الا مطنن
– وعتزيد الإمارات على السعودية؟
قدنا الا مطنن
– يا ذاك انتحاري واحد في دبي وخلى الإمارات كلها سع الجامع في صلاة الفجر مابلا صف واحد
السعودية تقول ما تسخاش وهذا ما تشتيش تمد يدها عليها
– مابش خلافات لا تصدق
يقلك قد وقعت اشتباكات في مطار عدن وجت الاباتشي حق الامارات كاوشت الجنود حق عبدربه وغلقوا المطار وساروا الرياض يتفاوضوا وهيا ناهي لك ناهي
– يا لطيف
وقلك ان الاماراتيين ادوا لهم هيثم قاسم طاهر وحنوا به يحرروا المخأ قلك قسمهم ما عادبش ثقة مع السعودية اللي تشتي تطمع كل شي، مغطها عبدربه وسكته 
– ثثثثثثثثثثثثثثثثثث
وحركوا لك حقهم الشّغال أبو العباس في تعز يفعل قلاقل ويبتزوا به وهذا
– اوه اوه اوه
وخلوا عيدروس الزبيدي يطلع يلخفج في مقابلة بالتلفزيون
– ايوه ابسرته
وفعلوا مجزرة بيت العزاء في أرحب، وقبلها مجزرة الصالة الكبرى حق عزاء بيت الرويشان خولان، مجازر في المناطق اللي يسموها طوق صنعاء عشان معركة تحرير صنعاء المرتقبة قلك، يفعلوا لهم هذي المجازر عشان يكسبوهم لاصفهم، كان الحوثي لاهو يشتي يكسب اهالي منطقة يحل حقهم المشاكل ويخلي سيارة في الخطوط الطويلة لاشي واحد معطل والا بنشر يساعدوه سع ما كان في طريق سفيان، والسعودية والإمارات يقتلوا اهالي المنطقة عشان يكسبوهم لاصفهم، يقتلوهم لاصفهم
– يا ساااااااااتر
قلت لك قد نسيوا الحوثي ما عادهمش حوله، قدهم يفعلوا ويفتعلوا مجازر بينهم البين لحقهم التحالف بدل ما كانوا يفتعلوها للحوثي 
– قدهم الا مختلفين صدق
لكن امانة انها كبيرة لاما يقلك مطامع الإمارات في اليمن يوووووه كان زمان المطامع البرتغالية، المطامع العثمانية، مطامع الفرس، مطامع الاحباش ..إلخ، كمّن ابوه ابوه ذلحين قلك مطامع الإمارات، مطامع ضاحي الخلفان يووووه
– يووووه يا رب استرنا
اليوم مطامع الإمارات غدوه مطامع البحرين اللي بعده ترجع تجي تطمعنا عصابة الرداء الأبيض
– فعله
والا ليمونة الحلوة حق طمطوم هذيك تجي تطمعنا
– يوه يا رب انا جارك
حرام يا ذاك ما قد وقعت
– الا وإيش يقول عبدربه
قول ايش يقول عبدالملك المخلافي ما عبدربه مسكين ما في يده، قل عبدالملك المخلافي
– طيب الحوثي ايش يقول الحوثي
الحوثي مشغول بمطامع السوق السوداء وايرادات الاتصالات والضرائب والجمارك والزكاة والمستشفيات واعادة تسويق الحشيش، من يقول على مطامع الحوثي
– الا وايش يقول؟
ولا يقول شي قلت لك قدوه طامع طمع قبلهم كلهم، جالس يقّتل له خلق الله هو وعفاش ويستبد بهم ويحبّسهم ويموتهم جوع
– ليش؟
لأنوه الموت لأمريكا
– الموت لأمريكا!
الموت لإسرائيل
– وتموتوا انتوا؟
ونموت احنا
– هـه كيف هذا
هو الله ..
– ليش!
عشان ترجع تجي امريكا واسرائيل اليمن واحنا ميتين كلنا ما تلقى عند من تأكل ولا من يدّي لها دبة ماء تشرب
– وااااااو !
خـطـة يا مالي معركة النفس الطويل 
– من ادى لهم هذي الخطة؟
سلمان الفارسي
– اللي ادى الخطة للرسول!
ايوه
– عادوه حي؟
حفيده، حفيد سلمان الفارسي
– والحوثي حفيد رسول الله
والحوثي حفيد رسول الله
– الا وما هو الحل ذلحين؟
الحل لما هو
– لخلاف الإمارات والسعودية في اليمن
مابلا يتقّسموا
– يتقّسموا
مابلا يتقّسموا اذا هم يشتوا يجلسوا اخوة الامارات تقول تشتي يقّسموا
– وما لهم ما يتقّسموا؟
السعودية ما رضيت تخرّج البصائر
– يعني تشتي تطمع اليمن كلها لها هـه
ايوه
– ما هي سابرة
ما هي سابرة.
*المقال خاص بـ(يمن مونيتور) ويمنع إعادة نشره دون الإشارة إلى مصدره الأصلي.
المقالات المنشورة تعبر عن رأي كتّابها ولا تعبر بالضرورة عن رأي “يمن مونيتور”.